Warbixin: Xorriyadda Guddoomiyaha Saxafiyiinta Gobolka Awdal

Guddoomiyaha Ururka Saxafiyiinta Somaliland ee Gobolka Awdal ayaa dib u helay xorriyaddiisii kadib muddo siddeed maalmood ah oo uu ku xidhnaa xabsiga hoose ee magaalada Boorama. Siideyntan ayaa loo arkaa talaabo muhiim ah oo ku saabsan ilaalinta xuquuqda saxafiyiinta iyo xoojinta doorka warbaahinta ee bulshada. Warbixintan kooban waxay iftiiminaysaa sida ay isku xilqaameen qaybaha kala duwan ee bulshada si xal nabadeed iyo wadatashi ku dhisan looga gaadho arrinta keentay xadhiggiisa.

Siideyntiisa ayaa timid kadib dadaallo isugu jira waanwaan, wadahadal iyo isu-soo dhowaansho ay sameeyeen odayaasha dhaqanka, bahda saxafadda, iyo masuuliyiin ka tirsan ururrada xirfadlayaasha sida ururka Qareenada Somaliland(SOLLA). Odayaasha dhaqanka ayaa door muuqda ka qaatay dejinta xaaladda iyo dhisidda kalsoonida, halka ururrada xirfadlayaasha ee SOLJA  iyo SOLLA ay xoogga saareen in la ilaaliyo sharciga, xuquuqda muwaadinka, iyo in aan la wiiqin madaxbannaanida warbaahinta. Isku-darka dadaalladan ayaa horseeday in si nabad ah oo sharaf leh xorriyaddiisa dib loogu soo celiyo, taas oo tusaale u noqon karta sida khilaafaadka noocan ahi loogu xallin karo wadahadal iyo is-qancin.
ugu danbeyna saxafiga ayaa qoraal kooban ku baahiyay bartiisa Facebook, isaga oo uga mahadceliyay cid kasta oo ka qayb qaadatay sii deyntiisa.

Qoraalka Saxafiga
"Ilaahay baa mahad oo dhan iska leh oo ii suurto geliyay in aan xorriyaddayda dib u helo. Marka xigta, waxaan u mahadcelinayaa dhammaan odayaasha dhaqanka , bahda saxafadda ee gobolka Awdal, Ururka Saxafiyiinta Somaliland Somaliland Journalists Association (SOLJA), guddoomiye ku-xigeenka Somaliland Bar Association, iyo masuuliyiinta Ururka Qareennada ee gobolka Awdal oo sabab u noqday sii deyntayda."